1985 - Pirihimana Stephen Linney

Translate into English

Te pakanga kia ora ai koe, Koukourarata, Horomaka, te 22 o Hune 1985

Te Mētara Tohu Toa o Te Kuini & Te Tohu o Charles Upham
6733 Pirihimana Stephen Linney

I te 20 o Hune 1985 i puritia e tētahi mauhere pūrere ētahi wāhine tokorua i tētahi pāmu mamao i Horomaka. Mō ētahi rā i muri mai wiwini ana te hapori tuawhenua i te mataku me te mōhio e huna ana pea te mauhere i te rohe.

I te 22 o Hune 1985 ka tirohia e ngā Pirihimana e Stephen Linney rāua ko Graham Glithero, tētahi whare pāmu kore tangata i Pūtiki, i Koukourarata, i te wā e rapuhia ana te kaihara. Ka tūpono atu ki tētahi matapihi pakaru ka hoki a Pirihimana Glithero ki te waka ki te waea āwhina i a Pirihimana Linney e mātaki ana i te whenua. Ka rongo hoihoi i ngā toka pātata. Ka nuku whakamua i te pango kerekere, ka ahu atu ki te tapa o te tai. Ka tata atu ia ka whiti te rama ki runga i tētahi tangata mau raiwhara. Ka tango a Pirihimana Linney i tana pū ka whakahaua te tangata kia tū. Ka whakahē te tangata ka mea ia: “Kore rawa au e mauria atu e koe. E kore au mō te hoki anō.” I ngana a Pirihimana Linney ki te rutu i a ia kia hinga ki raro kia taea e ia te here i ngā ringaringa. Ka kaha whakatuki taua tangata me te aha, he kakari wehi ka haere ake. I taua tukinga riri ka tākirikiri te tokorua ki te pupuri i te raiwhara, moto atu, moto mai, ā, pau rawa te hau.

Nāwai rā ka whakaanga te kaihara i te raiwhara ki te taha o Pirihimana Linney, ka mea ia: “Ko koe, ko au rānei.” Ka rongo a Pirihimana Linney kei te ngutu o te pū tōna ora, ka tango i tana pū hurihuri, kotahi pupuhi ki te waewae o te tangata. Ka tangatanga te raiwhara i te ringa o te kaihara ka makaia e Linney ki rō wai. Ka hiki taua tangata i tētahi porotāwhao nui ka kurukuru i te māhunga o Pirihimana Linney. Ka whakatuma te kaihara i a ia ki tana naihi, nā, ka kurua ia e Linney ki te reke o tana pū hurihuri, ā, ka herea ōna ringaringa.

He īnati te māia i whakaaturia e Pirihimana Linney ki te rutu i te kaihara maupū i runga i te wāhi uaua, tauhou hoki. He whakaatu hoki nāna i tōna rehe, i tōna kirimāia me ōna pūkenga kia hinga rawa ai i a ia tēnei kaihara ūpoko pakaru me te tūkino.