He tangata e mate ana ki te kōhuru i a ia anō ka whakarekereke kau atu, Papatoetoe, 27 July 2014
Te Mētara Tohu Māia o Aotearoa
RLAR23 Pouwhakataki Ryan Lilleby
Te Mētara Tohu Māia o Aotearoa CMY804
Pirihimana Christopher McDowell
Left to right:
Pouwhakataki Ryan Lilleby and Pirihimana Christopher McDowell
I te 27 o Hūrae 2014, i taki haere a Pouwhakataki Ryan Lilleby rātou ko Pirihimana Chris McDowell, ko tētahi atu pirihimana ki tētahi karanga āwhina mō te tūkino whānau i tū ki te rohe o Papatoetoe i Tāmaki.
Ka tūtaki ki tētahi wahine i waho o te whenua e whākī ana kei roto rā tōna hoa tāne e mau naihi ana e whakatuma ana ki te patu i a ia anō. I mua tata atu o tēnā e whakatuma ana ki te patu i a ia, tōna hoa wahine, ki te naihi.
I kite a Pouwhakataki Lilleby i te tangata mā tētahi matapihi tūwhera, ka whakahaua ia kia makere i a ia ngā naihi. Ka tahuri te tangata ki te tapahi i te kawititanga o tōna ringa ki tētahi naihi kāuta nui. Ka tomokia te whare e ngā pirihimana ka tūpono ki te tangata e noho ana i te tūru hāneanea me ngā naihi e rua.
Ka whakaanga a Lilleby rāua ko McDowell i ā rātou pū hiko ki te tangata me te whakahau kia makere atu ngā naihi. I te korenga ōna i aro ka pūhia e Pirihimana McDowell tana pū hiko, auare ake, kāore ōna aha ki te whakahinga i te tangata. Ka tū ake te tangata ka kōkiri ki ngā pirihimana me ngā naihi e whātoro ana. I mua o te whakawehenga o ngā pirihimana tētahi i tētahi i a rātou e hoki whakamuri ana kia puta i te rūma, ka pupuhi anō a Pouwhakataki Lilleby i tana pū hiko, tē taea te aha. Ka mau a Pirihimana McDowell i taua tangata i roto i te kāuta ka werohia tōna puku ki te naihi nui. Waimaria i āraingia te whakaripi o te naihi e tōna kahupeka kaupare weronga. I a te tangata e mea ana ki te wero i te kakī o Pirihimana McDowell ki te naihi iti, ka hopukina ia e Pouwhakataki Lilleby mai i muri nōna e pupuri ana i ngā naihi e rua, ā, ka mamau ki a ia ki te papa rā anō. Ka poua te ūpoko o taua tangata e Pouwhakataki Lilleby hei whakapōrewarewa i a ia. I muri iho o te tukinga tūkino nei i taea e ngā pirihimana e toru te whakahauraro me te mauhere i te kaihara.