He kaimaupū kei te whakatutū, Wainuiomata, 6 o Hanuere 2007
Tāriana Matua Eric Tibbott
Te Tohu Whetū Māia a Aotearoa
Kātipa Allister Rose
Te Tohu Whetū Māia a Aotearoa
Tāriana Matua Eric Tibbott me Kātipa Allister Rose
I te ahiahi pō o te Hātarei 6 o Hānuere, i hau te rongo ki ngā pirihimana, i pūhia tētahi tangata i tētahi wāhi i runga i te ara ahi tata atu ki te Rori o Summit i ngā puke i waenganui i Wainuiomata me Te Awakairangi. I tūpono ētahi kaieke pahikara e whā ki tētahi kaimaupū kātahi anō i kōhuru i tētahi tāne harakore, a Karl Kuchenbecker. I te ngana te kaimaupū ki te wehe wawe mā runga te mokopaika o te pārurenga. Nō Jeremy Simpson rāua ko Karl Holmes ka hipa i te kaimaupū i runga i te ara, i kitea a Karl e rāua e tīraha ana i te whenua, me te pū i mau i te kaimaupū. Parahutihuti ana te haere mā runga pahikara i te kaimaupū e puhi ana, ā, ka pūhia te tuke o Jeremy Simpson, me tō Karl Homes ringa mauī, taha anō hoki. I oma ki te whai haumarutanga me te ngana ki te whakamōhio atu ki ngā kaiurupare matua ki tō rātou mōrearea. Nō rāua e wehe atu ana, i tūpono ētahi kaieke pahikara anō a Nicholas Rea me tana tamāhine a Kate ki te wāhi tūkino. Nā te tangata hara tō Nicholas kanohi i meke me te ā i a ia ki te whakakā i te motopaika wīra whā. Me te aha, i pūhia e te kaimaupū he matā anō, ā, ka ripi te matā pū hoata ka pāngia ai te kakī me te ringa o Kate. I tahuti te whānau Rea ka whakamōhio tonu ai i ngā pirihimana.
I te 17:30 i urupare a Tāriana Matua Tibbott rāua ko Kātipa Rose i te karanga ka haere ai ki te wāhi ngahere e tūhono ai te Rori o Summit ki te ara ahi.
Nō ngā pirihimana e taraiwa ana ki te Rori o Summit, i rongo kōrero anō mō tētahi tāne pākira e maupū ana i ngā puke i Wainuiomata, he tohu anō i mōhio ai rāua ko te tangata rā, he tangata hara i te hiahiatia mō tētahi whakahara o mua mō te kōhuru i tētahi tangata harakore a Paul Anderson i tētahi whare whakangahau i te tau 1992. Kua takahia e ia ngā here o tana tukuhere, ā, kua puta ngā wārati hopu mōna.
Kia tae atu rātou ki te tihi o te Rori o Summit, kāore tētahi tangata i reira. I muri tata iho, i tuku kōrero ā-irirangi ki ngā pirihimana, ko te kaititiro, tōna tikanga i reira ia, i te huna ki wāhi kē i tētahi wāhi i te ara, tē hiahia ki te puta atu ki te hīkoi ki ngā pirihimana i taua wā. He kore nō tō rāua waka e taea te haere i te ara, i whakatau te tokorua ki te hīkoi i te ara ki te kimi i ngā kaititiro.
Me kore noa e tūpono rāua ki te kaihara, i whakatau ngā pirihimana ki te mau pū ‘Bushmaster’ ka kawea i roto i te waka, he nui atu nō te whānui o te pū i tēnā o te pītara ‘Glock’ ka kawea e rāua. I whakatuwhera a Kātipa Rose i te tou o te waka ka huakina ai te pouaka pupuri pū.
Nō ngā pirihimana e whakarite ana i ā rāua utauta, ka heke mai te kaimaupū i te huarahi mā runga tō Nick Rea pahikara e mau ana i tētahi pū hoata. I tōna kitenga atu i te waka pirihimana ka huna i muri i tētahi pou raima i te taituarā i tētahi kēti e tata ana.
I taua wā, kei a Kātipa Rose anake he tirohanga ki te kaimaupū, i tōna kitenga atu i te tangata hara ka tīkina tana pītara i tana tātua ka whakakeko, ā, ka hāmama “Kāti, he pirihimana maupū”. Hei urupare atu, ka whakamau te kaimaupū i tana pū kātahi ka whakakeko ki a Kātipa Rose.
Ahakoa i te whēkite noa iho a Tāriana Matua Tibbott i te mura o te ahi, i mōhio ia he tangata hara mōrearea, māngia anō hoki tērā. I mōhio ia he iti noa haumarutanga mō rāua i te waka pirihimana nō te pū a te kaimaupū, he nui te mōrearea. I whakatau a Tāriana Matua Tibbott ko tō rāua kōwhiringa anake ko te wehe atu ki tētahi wāhi haumaru ake, ā, ka nanao i te pokohiwi o Kātipa Rose me te tohu atu ki a ia, me oma rāua. Ka wehe atu i te waka pirihimana, ka oma atu ki te puke ki te whai wāhi i waho atu i te tirohanga o te kaimaupū. Ka kore e whāia rāua e te tangata hara, i whakamōhio atu a Kātipa Matua Tibbott i ngā taipitopito ki te Whare Whakawhitiwhiti Kōrero o Ngā Pirihimana.
i tēnei wā, i mōhio ngā pirihimana e rua, i mahue tā rāua kati i te tou o te waka pirihimana, i te tūtangatanga ngā pū. Ka taea e te tangata hara ngā pū katoa, ā, ahakoa kāore he matā i roto, kei a ia pea ōna ake, ka taea rānei ētahi atu te kimi. Nā te mea kei a ia ērā pū he whakatuma ia ki te oranga o ngā kaititiro e huna tonu ana i te heuheu me ngā kainoho o Wainuiomata me Te Awakairangi. I whakamōhio hoki ngā kaimahi o te Whare Whakawhitiwhiti Kōrero o Ngā Pirihimana i a Tāriana Matua Tibbott rāua ko Kātipa Rose, kāore i te wātea te Tira Ātete Kaihara Hāpai Rākau, ā, ka mate kia riro mā rāua kē e tutuki. Nā konā ka whakatau me hoki ki tō rāua waka whakahorohoro ai i te kaimaupū.
E mau ana i ā rāua pītara anake, i hoki atu ngā pirihimana e rua ki tō rāua waka me te ngana kia kore ai e kitea. Kia tae atu rāua ka kite rāua i te kaimaupū e paraketu ana i te tou o te waka, kei a ia hoki ngā pū pirihimana e rua. I whakatau a Tāriana Matua Tibbott kia puta atu i tōna wāhi huna e kite ai ia i te waka me te tangata hara. Nōna ka pērā, ka hāmama ia “he pirihimana maupū! Waiho ō pū.” Ka tahuri te kaimaupū me te whakakeko i tōna pū ki a Tāriana Matua Tibbott. He mōhio nō āriana Matua Tibbott he mōrearea mōna, ka puhi ia. I hapa ngā matā. I tū tonu te tangata hara me tana whakakeko tonu i tana pū ki a Tāriana Matua Tibbott i tere pūhia ngā matā e rua anō i pā ki te waewae o te kaimaupū ka taka ai ia ki te whenua.
…as police officers we were duty bound to act in the defence and protection of the public. It is part of the oath we took, it is what we do and it is our job. I decided that I was going to use concealment to make my way back to the patrol vehicle because I wanted to protect the public against an armed and dangerous individual who had already shot somebody and had threatened to shoot me and my partner.
My intention to go forward was to challenge … to prevent him from continuing his actions, to cause him to surrender and to detain and arrest him.
Tāriana Matua Tibbott
Te mātaitanga a IPCA i te puhanga, Pēpuere 2008
I taua wā, i aro a Kātipa Rose ki a ia ahakoa kāore i taea e ia te kaimaupū te kite i te wā i te rere ngā matā, kāore ia i mōhio mēnā i pāngia e ngā matā o Tāriana Matua Tibbott. Ko tētahi i pāngia te kaimaupū, ā, i motukina he ia-tuku me te nui o ngā toto i puta i te taotūtanga. Ka tupea te kaimaupū, ā, nā Kātipa Rose, he manapou tata te whakaora ohotata i mahi. I muri iho, i tūtohutia, i ora ia i tā Kātipa Rose i mahi ai.
I te wā ka whakaraua te tangata hara, kei a ia ngā pū pirihimana e rua, he pū moata, he māripi tukipoto me tētahi pīauau matarau.
I whakatinana a Tāriana Matua Tibbott rāua ko Kātipa Rose i te māia, ahakoa te mōrearea o te tū ki te tangata hara, e maupū ana kua whakaherea kētia mō te kōhuru, ā, i whakapaea nāna tētahi i kōhuru i taua rā. Nā ā rāua mahi tētahi atu mōrearea anō i ārai mō ngā kaititiro i te huna e tata atu ana, me ngā kainoho o Wainuiomata me Te Awakairangi. Nā ngā pūkenga whakaora ohotata a Kātipa Rose i ora ai te tangata hara.
Kei te whakaaro nuitia te whānau o Karl Kuchenbecker i te aituā nei me te mamae mauroa i pā ki a Jeremy Simpson, rātou ko Karl Holmes, ko Nicholas me Kate Rea.