Pirihimana Matua David Templeton
He haehaetanga, he kōhuru, me te whitawhita kia āraia he haehaetanga anō, Flatbush, te 21 o Hānuere 2003
Te Whakarākai Tohu Māia o Aotearoa
DT4656 Pirihimana Matua David Templeton
I te 21 o Hānuere 2003, i muri mai o te haehaetanga whakarekereke o ētahi wāhine tokorua i te rohe o Pārāwai, ka pūrere atu te kaihara ki te Tonga o Tāmaki. Ka tae ki reira ka pūhia a James Te Aute, mate tonu atu. He tangata harakore i waho o tētahi whare pikitia me te kai hoki. Ka mutu tēnā ka wehe te kaihara i te wāhi o te puhanga. E mahi kōtata ana a Pirihimana Matua Templeton me tana kurī Pirihimana, ā, ka tūpono ki te kaihara e pūrere ana i taua wāhi. Ka pūrongotia te waka me ngā mahi ki te Pokapū Pirihimana Whakawhitiwhiti me te whakamōhio atu e aru ana ia i te waka o te kaihara. Ka kite te kaihara e arumia ana ia, waiwaipū ana tana pū aunoa tōtika ki a Pirihimana Matua Templeton me tōna waka. He maha ngā matā i pā ki te waka. Kīhai a Templeton i paku mōhio e puhipuhia ana ia. Ā ka tau iho te māramatanga kua pēnātia ka taui ia ki tētahi wāhi ka hua iho ia he mamaonga pai. E pūrongo tonu ana ia i ngā nekehanga o te kaihara.
Nō muri tata mai, ka āta haere te kaihara, ā, ka whakaarotahi i te taiaho whakatata o tana pū ki te māhunga me te kanohi o Pouwhakataki Matua Templeton, ka rere anō ngā matā ki te pupuhi i a ia. Maringanui kīhai ngā puhanga i pā. I tēnei wā kua uru mai ētahi atu Pirihimana ki te aru i te kaihara. Ka pūrere anō ia he poto noa te haere kātahi ka urutomokia tētahi whare tata me te mauhere i ngā pakeke tokorua mō ētahi haora. Nāwai rā ka whakahauraro ia ki te Tira Ātete Kaihara Hāpai Rākau me te Tira Takawaenga Mauhere. I te mātainga o tēnei tūāhua ka hura mai e whā ngā whakawehenga o te wā i pūhia ai a Pouwhakataki Matua Templeton, ā, kotahi o aua matā i pā ki tōna waka i te pae raro o te kuaha taraiwa, tata tonu ki te wāhi e noho ana ia.
Arā atu anō ngā wā kua whakaatu a Pouwhakataki Matua Templeton i te māia.