2002 - Apareihana Kākāriki

Translate into English


Apareihana Kākāriki, te kōhurutanga o Pirihimana Pouaromātai Duncan Taylor, Rongotea, te 5 o Hūrae 2002

Te Whetū Tohu Māia o Aotearoa
JPD482 Pouwhakataki Pouaromātai Jeanette Park

Te Mētara Tohu Māia o Aotearoa
DTF272 Pirihimana Pouaromātai Duncan Taylor (murimate)

 

Pouwhakataki Pouaromātai  Jeanette Park and Detective Constable Duncan Taylor
Left to right:
Pouwhakataki Pouaromātai Jeanette Park and Pirihimana Pouaromātai Constable Duncan Taylor

I te takiwā o te 1pm i te 5 o Hūrae 2002, i taki haere a Pouwhakataki Jeanette Park me Pirihimana Pouaromātai Duncan Taylor ki tētahi kāinga i te Huarahi o Taipo, i Rongotea. I te whakatūpato rāua i tētahi whānau o reira ki tētahi tangata e mōhio ana ki a rātou, ko ia hoki te take o tētahi Pānui Parahau ā-Whare, ā, kua hoki pea ia ki te rohe. I a rāua e kōrero ana ki te whānau i kitea atu taua tangata e taraiwa ana, e tōhipa ana i te whare. Ko te tokorua Pouaromātai, kāore e maupū ana, ka aru i tōna waka i tū atu ai. Ka whakatata ngā Pouaromātai ki te waka, ka taraiwa atu te kaihara ka hoki ki te kāinga i te Huarahi o Taipo. Ko te waka o te kaihara me tō te Pirihimana i tū i te ara taraiwa o te whare. Ka heke ngā pirihimana e rua i te waka, ka tango te kaihara i tana raiwhara ka whakaanga ki a Pirihimana Pouaromātai Taylor, whāia kotahi pakūtanga o te pū mate tonu atu ia.

Ka whakaaro iho a Pouaromātai Park kia haere ki te āwhina i tōna hoa mahi engari ka kite i te kaihara e whakaanga ana i te raiwhara kūpara nui ki a ia. Ka pakū te pū, rere noa atu. Ka pakū anō te pū, ka pā ki a ia, kino atu te tūnga. Hei aha koa, ka tūrapa ia ki tua o te ara ārai kararehe i te pito mutunga o te ara taraiwa, ka pupuhi tuawhā anō te kaihara. I te pono mārika ōna ko te arumia ia e te kaihara, me hohoro te rapu āwhina. Ka whakaaro iho mā te huna haere ka āhei te whakawhiti i te pāmu e 500 mita te mamao atu ki tētahi whare. I reira ka whakaohiti i ngā tāngata o roto ki te mōreareatanga, ā, ka pūrongotia ngā āhuatanga o te wā ki ngā Apareihana Pirihimana. Ka tahuri ia ki te hari i ngā tāngata ki tētahi wāhi haumaru. Heoi kite kau iho kua tae tētahi atu waka Pirihimana tata rawa te tūnga ki te whare i tū ai te puhanga Kātahi a Pouaromātai Park ka piki haere mā tētahi kōawa ki te waka pirihimana ki te whakaoho i ngā pirihimana me nuku he wāhi haumaru kē. I taua wā rā kua ngaukino te mamae i tōna tūnga, tē taea te tū. Ka ngaoki haere i te te taha o te rori, ka whakatūpato i tētahi atu pirihimana ki te mōreareatanga. Ka mauria atu a Pouaromātai Park ki te hōhipera kia tirohia ōna tūnga.

Nā ngā mahi a Pouaromātai Park me Pirihimana Pouaromātai Taylor i whai wā te whānau ki te ārai i a rātou ki tetāhi rūma. Nāwai rā ka puta rātou ki te ora, kāore hoki i tūkinotia, i muri mai i te mauherenga o te kaihara.