He Pirihimana Waka tū i te riri o tētahi kaihara maupū, tūkino hoki, Rotorua, te 7 o Āperira 1986
Pirihimana Waka Robin Dudding
Te Mētara o Hōri Pirihimana Waka
447 Robin Dudding (murimate)
E mahi ana a Robin Dudding, Pirihimana Waka, i Moose Lodge, i Rotoiti, he kawenga tāna i ngā whakahaere whakahaumaru mō te haerenga mai o te Pirimia o Hingapoa. I taua wā tonu, e whānako ana tētahi tangata i ngā rawa o tētahi toa ki tana tūpara,18 tōna pakeke. Ā, ka whānako te kaihara i tētahi waka, papau ana te haere, whāia ka tuki atu ki tētahi tahataha rori. Ka kitea te tukinga e tētahi taraiwa taraka e tōhipa ana, ka tū ia ki te āwhina. Ka whakaanga te kaihara i te pū ki a ia ka whakahaua kia hautū atu ki Rotorua. Ka huri te taraka i te kokonga i Moose Lodge ka kite te kaihara i te waka pirihimana me Pirihimana Tuti Katene e tū ana i tōna taha. Ka pūhia te tūpara e te kaihara, pā tonu atu ki te kanohi o taua Pirihimana. I a ia e oma atu ana ka pūhia tuaruatia ia i tōna ringa matau.
I te huringa o Robin Dudding ki te āwhina i te Pirihimana ka whakahaua ia e te kaihara kia utaina tōna ake waka haere me te hautū i a ia ki te Whare Pirihimana o Rotorua. I te nui o tōna wehi ki te pēheatanga o te haere ki te Whare Pirihimana me te mōhio mārika kua pōkeka, kua keka taua tangata, ka whakaaro iho me takaroa ia, ā, ka hautū atu i Rotorua.
I kitea te waka pirihimana i te taha o te rori, tata ana ki Hamurana, e ētahi pirihimana e aruaru ana. E tū ana te kaihara i te taha o taua waka me te tūpara ki tōna ringa. Ahakoa ngā puhanga whakatūpato e toru a te Pirihimana, ka paneke haere ki a rātou me te puhipuhi. Ka tuawhātia he puhunga e te Pirihimana, ā, ka poro i a ia, ehara, ka tango ia i tētahi naihi i tōna tātua. Ka māunutia e te Pirihimana taua naihi ka mauheretia ia. I kitea a Robin Dudding i tōna waka pirihimana. I pūhia tōna kakī, patua rawatia.
Ka hāmenetia te kaihara mō te kōhuru i a Robin Dudding me te whai kia kōhurutia a Tuti Katene. He harakore te whakatau mō ngā whiu e rua nā runga i te kitenga he mate hinengaro tōna. Ka mate whakamomori i te whare herehere.
Mō tōna māia ki te ārai i te matehia kōhuru a te kaipupuhi, i whakawhiwhia murimatetia a Robin Dudding, Pirihimana Waka, ki te Mētara o Hōri. Ka mahue i a ia tōna hoa rangatira me ngā kōhine tokorua. Kāore i ārikarika ngā tāngata i mene atu ki tōna uhunga, he mano neke atu. I whakamihia tōna kaingākau ki ngā motokā tawhito me te haumaru waka i tōna rā nehu. Ko tētahi pānui mate nā te hunga hautū taraka e whakaahua pēnei ana i a Dudding: “He tangata ia i whakautengia e mātou katoa, tāria te wā ka tūtaki anō tātou me he piriti ine taumaha i taua huarahi matua ki te rangi.”