Te Rū i Waitaha, 12:51 22 February 2011
Te Mētara Tohu Māia o Aotearoa
MBG986 Pouwhakarite Michael Brooklands
Te Mētara Tohu Māia o Aotearoa
SCAD79 Pirihimana Shane Cowles
Te Mētara Tohu Māia o Aotearoa
MKAI41 Pirihimana Michael Kneebone
Te Mētara Tohu Māia o Aotearoa
DLAJ76 Pirihimana Daniel Lee
Te Mētara Tohu Māia o Aotearoa
Kirirarau Dr Chris Henry
Te Mētara Tohu Māia o Aotearoa
Kirirarau Dr David Richards
Te Mētara Tohu Māia o Aotearoa
Pouwhakaora James Watkis
Te Mētara Tohu Māia o Aotearoa
DJD413 Pirihimana Matua Danny Johanson
Te Mētara Tohu Māia o Aotearoa
Kaipatuahi Scott Shadbolt
Te Whakarākai Tohu Māia o Aotearoa
Kirirarau Dr Bryce Curran
Te Whakarākai Tohu Māia o Aotearoa
Kirirarau Dr Lydia Johns-Putra
Back row, left to right: Michael Brooklands, Shane Cowles, Michael Kneebone, Daniel Lee
Front row left to right: Bryce Curran, Lydia Johns-Putra, Danny Johanson, Scott Shadbolt
E mahi ana a Pouwhakataki Michael Brooklands i te pokapū o Ōtautahi, whāia ka rū te whenua, e 6.3 tōna kaha, ā, i rū nei i te 22 o Pēpuere 2011. Ko ia tētahi o ngā pirihimana tuatahi ki te whare Pouaka Whakaatu o Waitaha i turakina rā, ā, poua tonutia atu e ia tōna mana whakahaere ki taua wāhi rā. I whakapā atu ia ki te Tauwhitiwhiti Pirihimana me te whakapūrongo i ngā taipitopito, te tono Ratonga Patuahi me ētahi atu ratonga āwhina.
I ngiha noa mai he ahi i ngā papa whakararo o te whare me te whakauaua i ngā mahi whakarauora. I mahi tahi a Pouwhakataki Brooklands me ngā Pirihimana nei a Cowles rātou ko Kneebone, ko Lee i runga i te tuanui o te whare ki te whakahaere i ētahi whakarauoratanga maha i waenga i ngā mōhungahunga o te ara pourewa o te whare. Ka mōrearea mō rātou i te haora tuatahi i a rātou e mahi ana i raro i te ara pourewa tāwēwē e ngahoro haere ana i ia ngateri.
I te tuatahi i whakawātea rātou i tētahi wahine me ngā tamariki tokorua. Kātahi ngā taringa pirihimana ka areare ki te whakarongo ki ngā pātōtō, ki ngā reo rānei, ā, ka mōhio ake ki ngā wāhi i reira ētahi mōrehu e waru. Ki ngā wāhi e taea ana e rātou ka keri whakararo ngā pirihimana ki ngā mōrehu me te whakamahi i ngā tīkawe i tīkina ai i te whare Tari Tāke tūtata, ki te amo i a rātou ki ngā kaimahi whakaora. I rongo rātou i tētahi wahine e karanga āwhina ana i te wāhi o te whare e kā ana. He maha ngā whakamātauranga kia tae ki a ia me te tākaikai mākū anake ki ō rātou māhunga hei kaupare atu i te wera me te auahi. I tū tēnei mahi i mua i te taenga mai o te Whakaratonga Iwi ki taua wāhi. Nā runga i te ahunga kētanga o te pupuhi hau mō tētahi wā poto i tarea e rātou te heke whakararo ki roto i te whare ki te tiki i taua wahine me te huhuti i a ia. I tua atu o te piki ki roto i te whare me te āwhina ki te whakarauora mōrehu, he mea whakahaere hoki e Pouwhakataki Brooklands ngā nekeneke o ngā kaimahi i taua wāhi rā. I angitū te tira pirihimana ki te whakarauora i ngā tāngata tokoono i te wāhi CTV. He pūrangiaho te whakawhiti kōrero a Pouwhakataki Brooklands ki te Pokapū Tauwhitiwhiti Pirihimana me te whakamōhio i a rātou ki ngā hiahia mō te wāhi. I whakaritea e ia he mahere tukutuku mō te rapu ki rō whare me te tono kaimahi ki ētahi whaitua i āta tohua e ia ki reira rātou. Ka mutu ka whakatū ia i tētahi whaitua mātai wharanga me tētahi putunga tūpāpaku. I noho tonu ko Pouwhakataki Brooklands te Kaiwhakahaere Pirihimana tae noa ki te 3 karaka i te ata o te rā i muri mai.
He mea tono a Pirihimana Matua Danny Johanson me tētahi tira pirihimana ki te kawe kete manapou me ētahi atu pūrere motuhake ki te pūmanawa o te tāone. He mea whakamahi e te tira he pūrere tapahī raima ki ētahi whaitua maha, ā, ko rātou te aroākapa mō ētahi whakarauoratanga maha i te Tokapū o Pyne Gould (PGC) me ngā whare Pouaka Whakaata o Waitaha.
I mahi tahi a Pirihimana Matua Johanson rātou ko tētahi kaipatu ahi me ētahi tākuta kirirarau e rua ki te whakarauora i a Brian Coker i mau rā ki roto i te whare PGC. E mānukanuka ana ka mate a Tā Coker i te rerenga o te toto i a ia, ko ōna waewae i pinehia i waenga i ngā poupou raima me tētahi wāhanga papa kua horo. I uru a Pirihimana Matua Johanson ki te poronga o ngā waewae e rua o taua tangata i poroa ai ki tētahi kani ringa me tētahi naihi pene. I roto rā i te pō kerekere o te whare kua horo, ka piki a Pirihimana Matua Johanson ki roto i tētahi wāhi whāiti i te taha o te tangata i mau rā. E takoto ana ia ki runga i tētahi arapiki, ko ōna waewae kei runga i a ia kia taea ai taua wāhi te whātoro me te whakahaere i te poronga. I whakamoea ia ki te rehunanu me te ketamine me ētahi here purutoto i herea nei ki ngā waewae e rua. Ka ngenge haere te tākuta kirirarau e poroporo ana, ā, ka hoatu te kani ringa ki a Pirihimana Matua Johanson. Ko te rata tuarua me te kaipatu ahi hoki i uru ki taua mahi rā, poro atu, poro mai, ā mutu noa. Ka utaina te tangata ki tētahi tāpōrena ka mauria atu ki ngā kaimahi waka tūroro e whanga ana ki waho o te whare. He maha tonu ngā ngateri i puea ake i te wā o te poronga waewae e whakamōrearea ana i te whaitua i reira a Pirihimana Matua Johanson e mahi ana. Nā te whakapau kaha ō rātou a Tā Coker i ora ai.
Canterbury Earthquake